Lajme të mira vijnë nga jashtë vendit për besimtarët e krishterë si Ortodoksë ashtu dhe për ata Katolikë.
Prelatët më të lartë të klerit të krishterë në vend, kanë arritur të mposhtin koronavirusin duke marrë rezultate pozitive nga analizat dhe sjellja e organizmit të tyre karshi virusit.
I pari lajm i mirë erdhi sot nga Greqia për besimtarët ortodoks, kryepeshkopi i të cilëve, Anastas Janullatos, mësohet se ka mposhtur koronavirusin dhe do të lërë po sot spitalin.
Pasi qëndroi për 12 ditë i shtruar në një klinikë të specializuar në Athinë, Anastas Janullatos duket se është bërë më mirë.
Sipas autoriteteve mjekësore, Kryepeshkopi u paraqit në spital me simptoma të lehta dhe ethe të shkallës së ulët. Kryepeshkopi pas daljes së tij nga spitali, do të qëndrojë në banesën e tij i izoluar, duke ndjekur të gjitha udhëzimet e dhëna.
Po ashtu sot, nga përtej Adriatikut në Bari, erdhën sërish lajmë pozitive për gjendjen shëndetësore të Arqipeshkvit të Tiranës dhe Durrësit, imzot George Frendo, i cili po kurohet në spitalin klerikal “Miulli di Acquaviva delle Fonti” të Barit.
Sipas zyrës së shtypit të spitalit klerikal në Bari të Italisë, u njoftua se gjendja e Imzot Frendos është më e qëndrueshme.
“Gjendja shëndetësore e Arqipeshkvit George Frendo është e qëndrueshme, pa temperaturë. Parametrat klinikë janë të qëndrueshëm. Ushqehet dhe për momentin ndjek terapinë me 2 litra oksigjen (tuba oksigjeni në hundë). Kryen meshën e ditës,”- ka thënë zyra e spitalit.
Gjithashtu bashkë me Arqipeshkvin Frendo nga Tirana ka shkuar për kurim në Bari dhe prifti italian Buonaventura Mossuto, i cili kryen shërbimin e tij klerikal në Shqipëri.
Sakaq për gjendjen e tij shëndetësore zyra e shtypit të spitalit të Barit, ka thënë se, gjendja shëndetësore e tij është e qëndrueshme. Sipas tyre, ai nuk ka temperaturë dhe po ndjek terapinë me maskë oksigjen 4 litra. Gjithashtu, ushqehet dhe lëviz normalisht.
Imzot George Frendo më datën 13 nëntor u infektua me Covid-19 dhe u dërgua për kurim në spitalin “Acquaviva delle Fonti”, në Miulli (Bari) të Italisë.
/GazetaReforma.com/
