Fqinji ynë perëndimor, Italia, po kalon një situatë tepër të vështirë për shkak të Covid, ku pothuajse çdo ditë ka patur qindra të vdekur nga koronavirusi dhe mijëra raste të reja.
Qeveria Conte 2, po tenton që të krijojë një strategji ekzekutive që parashikon një qasje të dyfishtë, për të shmangur kolapsin e sistemit shëndetësor dhe tejmbushjen e spitaleve.
Qeveria qëndrore ka caktuar komisionerin e jashtëzakonshëm, Domenico Arcurin për tu marrë me ngritjen e një strukture kombëtare paralele me spitalet, në trajtën e hoteleve Covid.
Sipas strategjisë qeveritare, struktura e hoteleve të cilat do të përdoren si spitale Covid, duhet të ngrihen në çdo provincë të territorit kombëtar, e barabartë me 110 struktura ku të infektuarit me simptoma të vogla mund të bashkohen.
Sigurimi i hoteleve Covid do të bëhet në funksion të njerëzve pa simptoma të rënda, të cilët kanë vështirësi të qëndrojnë në karantinë.
Nga ana tjetër, do të vihet në funksion ideja e qëndrimit të pacientëve pa simptoma të rënda, në kushte shtëpiake, në mënyrë që të lehtësohen dhomat e urgjencave nëpër spitale.
Qeveria Conte tashmë në fazën e parë të menaxhimit të urgjencës shëndetësore, vendosi që të shkohet në drejtimin e strukturave paralele me hotelet-Covid, sidomos në zonat e kuqe, ku veçohet rajoni i Lombardisë, i cili është një nga rajonet më të prekura nga Covid-19.
Ministria e Shëndetësisë italiane, ka vendosur ndalimin e të gjithë shërbimeve jo urgjente dhe shtrimeve të planifikuara në spital.
Sakaq rajonet që janë brenda zonave të kuqe, kanë filluar të pajisen me hotelet-Covid, për mos tu kapur në befasi si në rastin e valës së parë të virusit gjatë muajve mars-prill. Kujtojmë se gjatë valës së parë të koronavirusit, u tejkaluan mbi 18 mijë shtretër mbi kapacitetet e hapësirave spitalore./GazetaReforma.com/
