Më 13 dhe 14 qershor, ky fshat piktoresk buzë liqenit të Shkodrës mirëpriti vizitorë e dashamirës të trashëgimisë kulturore në kuadër të eventit “Tregime Fshati”.
Aktiviteti u zhvillua në kuadër të nismës “N’Fshat”, e cila prej vitit 2022 mbështetet nga GIZ Albania dhe Ministria e Turizmit dhe Mjedisit, me synimin për të promovuar zhvillimin e qëndrueshëm rural përmes fuqizimit të komuniteteve dhe vlerave autoktone.
Programi i pasur i këtij edicioni solli në vëmendje jo vetëm bukuritë natyrore të Zogajt, por edhe jetën e përditshme, zakonet dhe artizanatin e banorëve.
Të pranishmit morën pjesë në guida lokale në rrugicat karakteristike të fshatit dhe buzë liqenit, dëgjuan rrëfime historike, ndoqën projeksione filmash në natyrë, punuan me duart e tyre në punëtori artizanale dhe shijuan gatime tradicionale.
Pjesë e rëndësishme e këtij aktiviteti ishte edhe panairi i artizanatit, ku qilimat e endur me dorë nga gra të zonës morën vëmendjen e vizitorëve. Me ngjyra të ndezura dhe motive të trashëguara brez pas brezi, këto punime përfaqësojnë shpirtin artistik dhe identitetin kulturor të komunitetit.
“Është bërë aplikimi për fshatin më të mirë turistik në botë. Shqipëria konkuron me gjashtë fshatra dhe Zogaj është një ndër to”, u shpreh Gent Fetahaj nga “GIZ Albania”.
Liqeni i Shkodrës, një simbol i përkatësisë dhe krenarisë për banorët, mbrohet prej tyre me fanatizëm nga peshkimi i paligjshëm.
“Ne e kemi konsideru liqenin tonin, nuk kemi gjuajtur me dinamit e gjenerator për të mos dëmtuar krapin,” tregoi Jup Rilla, banor i Zogajt.
Atmosfera përgjatë eventit u gjallërua nga muzika live buzë liqenit, ndërsa lundrimet me varka ofruan çaste qetësie dhe reflektimi në gjirin e natyrës.
Zogaj, përmes këtij organizimi, dëshmoi se është më shumë se një destinacion turistik, është një thes i gjallë kulture, mikpritjeje dhe autenticiteti shqiptar.
