Ministri i Shëndetësisë në Maqedoninë e Veriut, Venko Filipçe ka thënë se nuk do të japë dorëheqjen pa përfunduar hetimet për zjarrin në spitalin Covid të Tetovës. Në një deklaratë për mediat, ai tha se në këtë periudhë është e nevojshme që të menaxhojë krizën, veçanërisht për pacientët e Tetovës. Felipçe deklaroi se pas mbarimit të hetimeve do të komunikojë vendimin nëse do dorëhiqet apo jo.
“Sot në shumë media kishte thirrje për dorëheqjen time, më lejoni që të them se nga përgjegjësia as kam ikur e as do të ikë, por do të pres që të përfundoj hetimi. Për shkak se edhe në këtë periudhë ka nevojë për menaxhimin e një pjese të krizës, posaçërisht për pacientët e Tetovës, lidhur me atë që ndërlidhet me obduksionin. Dhe pas mbarimit të hetimit do ta sjell këtë vendim nëse do të jap dorëheqje. Është e vështirë të përshkruhet me fjalë barra dhe dhimbja që e ndjej, bashkëndjej dhimbjen me familjarët e viktimave, por megjithatë do të pres përfundimin e hetimeve”, tha ai.
Më tej, ministri i Shëndetësisë u shpreh se spitalet modulare janë të sigurta në të gjitha qytetet dhe se materialet që janë instaluar në to janë të certifikuara e të testuara. Ai garantoi se në spitalin e Tetoovës që u shkrumbua nga flakët, janë kryer të gjitha kontrollet.
