Një zjarr masiv ka përfshirë luginën e Shkopetit, duke shkrumbuar disa hektarë pyje me pishë të zezë.
Flakët u aktivizuan pasditen e së shtunës dhe vijuan me intensitet gjatë gjithë së dielës, duke u përhapur me shpejtësi për shkak të terrenit të vështirë dhe bimësisë së dendur.
Pavarësisht përpjekjeve të zjarrfikësve të bashkive Kurbin dhe Mat, forcave të armatosura dhe shërbimit pyjor, ndërhyrja nga toka rezultoi e pamundur. Në ndihmë të operacionit, pasditen e së dielës u përfshi edhe një helikopter i Ministrisë së Mbrojtjes, i cili arriti të izolojë njërën anë të vatrës.
Por gjatë mbrëmjes, flakët u përhapën në drejtim të kundërt, duke kaluar malin dhe zbritur pranë digës së hidrocentralit të Shkopetit e mbi disa banesa.
Situata mbetet e rëndë edhe në Parkun Kombëtar “Lurë–Mali i Dejës”, ku prej dy javësh zjarri vijon të djegë sipërfaqe të mëdha pyjore. Deri më tani, janë shkatërruar dhjetëra hektarë me pishë të zezë dhe ah. Ndërhyrjet janë të kufizuara për shkak të terrenit të thepisur dhe kushteve të pafavorshme.
