Prokuroria e Tiranës ka përfunduar hetimet dhe ka dërguar për gjykim dosjen e zjarrit që përfshiu Qendrën Spitalore Universitare “Nënë Tereza” më 29 shkurt 2024.
Nga hetimet rezulton se dy specialistë të Sektorit të Inxhinierisë Klinike në QSUNT, Enea Koka dhe Ejnar Shena, kanë neglizhuar detyrimet e tyre, duke mos siguruar funksionimin e sigurt dhe mirëmbajtjen e pajisjeve mjekësore, përfshirë UPS-të dhe bateritë e sistemit të energjisë emergjente.
Sipas prokurorisë, mungesa e një projekti të detajuar për instalimin e UPS-ve dhe mosrespektimi i standardeve teknike të sigurisë ishin faktorët kryesorë që çuan në shpërthimin e zjarrit.
Gjithashtu, ata nuk kishin garantuar as masat e duhura për mbrojtjen nga zjarri, duke lejuar përhapjen e flakëve dhe dëmtimin e godinës.
Çështja tashmë do të shqyrtohet nga Gjykata e Shkallës së Parë e Juridiksionit të Përgjithshëm në Tiranë, ku të akuzuarit do të përballen me akuzën për “Shpërdorim detyre”.
