Zjarri në malin e Dukatit në Vlorë vijon të jetë aktiv dhe me intensitet të lartë, pavarësisht ndërhyrjes nga ajri që u realizua një ditë më parë me dy avionë të ardhur nga Greqia.
Flakët janë afruar rrezikshëm pranë Parkut Kombëtar të Llogarasë, duke vënë në alarm autoritetet dhe forcat zjarrfikëse, të cilat janë përqendruar pikërisht në atë zonë për të frenuar përhapjen e mëtejshme.
Ndërkohë, pritet që sot të rifillojë ndërhyrja ajrore me avionët grekë, të cilët u angazhuan edhe një ditë më parë në përpjekje për shuarjen e flakëve. Përmes Mekanizmit Evropian të Mbrojtjes Civile, Bashkimi Evropian ka vënë në dispozicion flotën e saj për ndihmë ndaj Shqipërisë në përballimin e emergjencës.
Deri më tani janë aktivizuar tre avionë të tipit Canadair, dy prej të cilëve nga Greqia për zonën e Dukatit dhe një tjetër nga Italia që është angazhuar në operacionet në Parkun Kombëtar të Lurës.
BE ka deklaruar se mbetet e gatshme të ofrojë ndihmë shtesë nëse situata e kërkon.
