Zjarri në malin e Dukatit në Vlorë vijon të jetë aktiv prej disa ditësh, duke vështirësuar ndërhyrjen për shkak të terrenit të thyer.
Në ndihmë të operacioneve për shuarjen e flakëve janë angazhuar dy avionë “Canadair” të ardhur nga Greqia, të cilët kanë nisur operacionet që prej pasdites së djeshme.
Ndërkohë, në kuadër të Mekanizmit të Mbrojtjes Civile të Bashkimit Europian, edhe Italia ka reaguar duke dërguar forca zjarrfikëse dhe dy avionë të po të njëjtit model.
Mjetet fluturuese italiane kanë ndërhyrë në zonën e “Liqenit të Luleve” brenda Parkut Kombëtar të Lurës, një tjetër vatër aktive zjarri.
Paralelisht, mbrëmjen e kaluar, ministri i Mbrojtjes Pirro Vëngu ka inspektuar nga afër situatën në fshatin Shetel të Shijakut, ku një tjetër zjarr kishte rrezikuar banesat. Ministri njoftoi se flakët janë izoluar dhe rreziku për zonën e banuar është shmangur.
