Një ngjarje e rëndë ka ndodhur mbrëmjen e së shtunës në Kamëz, ku ambientet e Komisariatit të Policisë Nr. 5 janë përfshirë nga zjarri. Viktimë e ngjarjes mbeti 26-vjeçari Arben Mici, i cili ishte dënuar më parë për dhunë në familje, ndërsa në spital janë dërguar të plagosur 2 punonjës policie.
Gjykata e Tiranës ka dhënë sot masën e arrestit me burg për 2 efektivët të cilat kanë qenë të pranishëm në momentin kur komisariati i Kamzës u përfshi nga flakët dhe ku gjeti vdekjen 26-vjeçari Arben Mici, i ndaluar për dhunë në familje.
Po ashtu mbeti i plagosur edhe shtetasi Dilaver Idrizi, edhe ky i dënuar ndërsa mes të plagosurve është efektivi Hajredin Boja.
Ky i fundit së bashku me efektivin tjetër Fatmir Isufi akuzohen për shpërdorim detyre.
Kujtojmë që 26-vjeçari, Arben Mici, i burgosuri që mbeti viktimë e zjarrit, që dyshohet se e vuri vetë në Komisariatin numër 5 në Tiranë, ishte arrestuar për dhunë fizike dhe psikologjike të ushtruar ndaj nënës së tij.
Lirije Mici, është nëna e gjashtë fëmijëve. Ajo ka deklaruar se jeton bashkëshortin, dy djemtë e saj, njëri prej cilëve Arben Mici, i pamartuar dhe që prej gjashtë vitesh ushtron dhunë psikologjike me sharje, ofendime e kërcënime të ndryshme por edhe dhunë fizike.
