Pesë persona janë vënë nën hetim në lidhje me zjarrin e përmasave të mëdha që përfshiu një ditë më parë fushën e mbetjeve në Vlorë.
Policia ka referuar materialet në Prokurori për:
• Francesko Tozaj, Drejtor i Ndërmarrjes së Pastrimit pranë Bashkisë Vlorë
• Alpin Skëndaj, përgjegjës i Bordit të Kullimit
• Luan Dalipaj, Endrit Delaj dhe Daniel Islamaj, të tre me detyrë manovratorë në këtë ndërmarrje
Zjarri i djeshëm ngriti alarmin për rrezik të përhapjes në zonat përreth, ndërsa hetimet janë përqendruar tek mosrespektimi i detyrimeve për mbrojtjen e mjedisit dhe menaxhimin e mbetjeve.
NJOFTIMI I POLICISË:
U referuan materiale në Prokurori dhe nisën procedimin penal për shtetasit F. T., 31 vjeç, me detyrë Drejtor i Ndërmarrjes së Pastrimit pranë Bashkisë Vlorë, A. S., 36 vjeç, përgjegjës i Bordit të Kullimit pranë Bashkisë Vlorë, L. D., 56 vjeç, E. D., 27 vjeç dhe D. I., 35 vjeç, të tre me detyrë manovratorë në ndërmarrjen e Bordit të Kullimit të Bashkisë Vlorë, pasi më datë 07.06.2025, rreth orës 12:18, në lagjen “24 Maji”, Vlorë, si pasojë e temperaturave të larta, ka rënë zjarr në fushën e grumbullimit të mbetjeve urbane dhe shtetasit e sipërpërmendur kanë neglizhuar kryerjen e detyrës, duke mos marrë masa në kohë për shuarjen e zjarrit, duke sjellë ndotje të mjedisit.
