Shqipëria vazhdon të përballet me situatën e rënduar nga zjarret, ku numri i vatrave aktive ka arritur në 17. Agjencia Kombëtare e Mbrojtjes Civile bën me dije se gjatë 24 orëve të fundit janë regjistruar gjithsej 34 vatra zjarri në të gjithë vendin.
Situata më kritike paraqitet në jug, ku zjarret në disa fshatra të bashkisë Himarë, përkatësisht në Sasaj, Lukovë dhe Shën Vasil, janë vënë nën kontroll pas ndërhyrjes nga ajri me helikopter. Megjithatë, tre vatra mbeten ende aktive. Prej katër ditësh, forcat zjarrfikëse, policia dhe emergjencat civile ndodhen në terren për të izoluar flakët dhe për të parandaluar përhapjen e mëtejshme të tyre.
Në Parkun Kombëtar të Prespës situata mbetet shqetësuese, ku mbi 150 forca emergjence po punojnë intensivisht për të vënë në kontroll zjarrin. Edhe në qarkun e Dibrës janë raportuar katër vatra aktive, me më problematiken që mbetet ajo në Parkun Kombëtar të Lurës.
Policia ka arrestuar disa persona të dyshuar për shkaktimin e zjarreve. Rasti më i fundit është ai i një 80-vjeçari nga Vau i Dejës, i cili akuzohet se ka ndezur zjarr në varrezat e fshatit Barbullush, duke shkaktuar djegien e një sipërfaqeje të konsiderueshme me shkurre.
Autoritetet vijojnë të apelojnë për kujdes maksimal dhe bashkëpunim nga qytetarët, ndërsa situata vijon të mbetet e rrezikshme në disa zona të vendit.
