Ministri i Mbrojtjes, Niko Pelshi ka qenë në Voskopojë ku zjarret kanë rrezikuar edhe pyllin me pisha. Në një prononcim për mediat peleshi tha se zjarret janë të qëllimshme, pasi ka pasur 5 vatra në të njëjtën kohë. Ai u shpreh se ka forca të vazhdueshme për të përballuar flakët dhe dështimi aty do të ishte një fatalitet.
“Para një ore, këtu në Voskopojë ka pasur një shpërthim zjarri, një vatër që nuk nxitoj të them që është e qëllimshme sepse në të njëjtën kohë patëm 5 vatra të ndryshme. Është shumë e rrezikshme si vatër, pasi zjarri ka depërtuar në zemër të pyllit. Gjithsesi ka disa rrethana pozitive. Sapo kemi bërë një konsultë me komandantin e zjarrfikësve të Bashkisë së Korçës. Kemi forca të vazhdueshme do të kemi dhe katërfishin të tyre për pak. Është fatalitet nëse do të dështonim këtu. Por rreziku është i shtuar nëse flakët kapërcejnë në zona më të dendura të parkut”, tha Peleshi.
Ministri falenderoi edhe forcat zjarrfikëse, ndërsa shtoi se zjarre ka pasur në Fier, Thirrë etj. teksa beson se do të mbahen nën kontroll.
“Falenderoj forcat zjarrfikëse. Kemi 60 trupa të FA në lartësinë e Karaburunit, aty ku fillon Parku i Llogarasë. Kemi përcaktuar strategjitë se si do të bëjmë disa ndërhyrje me teknikat e mbrotjes nga zjarri. Besoj do të jetë një natë e sigurt edhe kjo. Kemi pas zjarre në Fier. Jemi të shqetësuar për vatrën në Thirrë, në Tunelin e Kalimashit, është situatë e vështirë, por besojmë se do e mbajmë nën kontroll. Ne tashmë kemi dhe mjetet tona dhe ndihmat e BE, njëri prej tyre është në territor ndërsa tjetri në Rinas, i gatshëm për të zëvendësuar dhe kombinuar fluturimet. Bëhet fjalë për helikopterët që kanë kapacitet deri në 10 mijë litra. Ai ka operuar në zonën e Karaburunit, ndërsa helikopteri tjetër ka punuar në Veri, dje, edhe sot ka pasur fluturime aty”, ka thënë ai.
Peleshi bëri me dije se ka shumë arrestime, ndërsa të tjerë janë nën hetim. Ai i quajti kriminel të gjithë ata që ndërmarrin vepra të tilla dhe tha se pas kësaj do të merren sërish me ta, në mënyrë që të shmangen këto ngjarje në të ardhmen.
Këtu ka një grup të vogël turistësh, prioritet është jeta e tyre. Policia kufitare ka ndërhyrë për t’i evakuuar dhe mbajtur larg vatrës. Janë zjarre dinamike. Këtu në Voskopojë, ku dhe jemi, është freskët përgjithësisht, kështu që zjarret nuk mund të vijnë nga natyra, por nga dora e robit. Ka shumë arrestime, disa të tjerë janë nën hetim. Nëse në letër është sipërfaqe e gjelbër, t’i bëj ç’të duash nuk ndërton dot, o keqbërës, o kriminel, sepse realisht kemi prekur dorën kriminale në të gjithë vendin, që qëllimet merren me mend. Do të merremi shumë fort pas kësaj, për të shmangur këto ngjarje në të ardhmen”, tha Peleshi.
