Dy vatra të reja zjarresh janë regjistruar mbrëmjen e sotme në vend. Njëra prej tyre është regjistruar në Berat. Zjarri mësohet se ka rënë në kurorën me pisha në malin Partizan, që shtrihet mbi lagjen “Goricë”.
Në vendngjarje kanë mbërritur menjëherë forcat zjarrfikëse të Beratit, të cilat kanë bërë të mundur që flakët të vihen nën kontroll, pa shkaktuar dëme. Zjarri dyshohet se është i qëllimshëm, i dyti ditën e sotme në Berat.
Policia është duke punuar për identifikimin dhe kapjen e autorit ose autorëve që mund të kenë ndezur qëllimisht zjarrin në kurorën me pisha në malin Partizan, i cili nëse nuk do të ishte vënë nën kontroll në kohë, mund të rrezikonte edhe banesat në lagjen muzeale të “Goricës”.
Po ashtu, një zjarr tjetër është regjistruar këtë mbrëmje edhe në një lagje të qytetit të Fushë-Krujës. Zjarri mësohet se ka rënë në lagjen Magaze dhe është përfshirë nga flakët e mëdha një sipërfaqe e mbuluar me shkurre e ferra.
Në afërsi të vatrës së zjarri ka edhe disa banesa, të cilat rrezikohen nga flakët. Në vendin e ngjarjes kanë mbërritur forcat zjarrfikëse dhe po punojnë për vënien në kontroll të flakëve, në mënyrë që t’i mbajnë larg banesave.
