Vatrat e zjarreve në vendin tonë vazhdojnë ende të jenë aktive në disa zona. Pavarësisht ndërhyrjes nga ana e forcave të zjarrfikëses por dhe falë ndihmës së dhënë nga banorët që jetojnë aty pranë përsëri nuk është bërë e mundur shuarja totale e flakëve.
Maja e Rrunës në Kukës vijon të jetë nën ‘pushtetin’ e flakëve prej 16 ditësh, ku po digjen sipërfaqe të tëra me pemë e kullota. Bëhet me dije se në terren për shuarjen e zjarrit janë angazhuar 10 forca të zjarrfikëses, 8 forca të pyjores dhe si dhe 15 forca të Detashmentit të Mbrojtjes Rajonale Kukës, por ende nuk është bërë e mundur neutralizimi i flakëve. Ndërkohë është kërkuar edhe ndërhyrja nga ajri.
Vijon të jetë aktive edhe vatra në vendin e quajtur Stanet e fshatit Morin zonë e mbrojtur Mali Koritnikut. Për izolimin e kësaj vatre janë angazhuar 5 punonjës të zjarrfikëses Kukës dhe 10 forca nga bashkia Kukës.
Fatmirësisht janë neutralizuar flakët në Përroin e Vishës në Himarë, ndërsa po punohet për shuarjen totale të zjarrit. Zona e Përroi të Vishës u përfshi nga flakët mbrëmjen e djeshme, ndërsa dyshohet se ka qenë zjarrvënie e qëllimshme, për të hapur kullota për bagëtitë. Megjithatë autoritetet nuk kanë identifikuar ende autorin apo autorët.
