Kryeministri i Kosovës, Albin Kurti, ka dhënë sot detaje në lidhje me situatën e krijuar nga zjarret në disa vatra. Kurti ka pranuar se nuk ka mjaftueshëm zjarrfikëse. Kryeministri tha se komunat e rrezikuara nga zjarret, janë duke u ndihmuar nga komunat fqinje për ta përballuar situatën me përhapjen e zjarreve. Mes të tjerash, kryeministri u shpreh se këto komuna nuk kanë pajisje të mjaftueshme në kuadër të Brigadave të Zjarrfikësve.
“Është evidente që komunat nuk numër të mjaftueshëm të zjarrfikësve, ndonëse mund të kenë pajisje të mjaftueshme dhe komunat fqinje po i ndihmojnë këto komuna që janë më të rrezikuara. Jam në kontakt të vazhdueshëm me kryetarët e komunave dhe me mundësitë që kemi po e bëjmë më të mirën”, tha fillimisht Kurti.
Më pas, kryeministri i Kosovës shtoi se mbajtja nën kontroll e këtyre zjarreve, paraqet një sfidë të madhe për Kosovën. “Ne tani si institucione po mobilizohemi maksimalisht. Kemi kërkuar edhe ndihmën e FSK-së, e madje edhe të KFOR-it. Besoj që mbajtja nën kontroll e këtyre zjarreve të egra paraqet një sfidë të madhe për shtetin tonë. Kemi arritur që tash për tash të mos kemi dëme të mëdha materiale e sidomos dëme në njerëz”, përfundoi Albin Kurti.
