Gramshi vazhdon të përballet me një krizë të rëndë për shkak të zjarreve që kanë shkrumbuar fshatra të tëra dhe kanë marrë jetë njerëzish.
Edhe sot, nga masivet pyjore të zonës ngrihen shtellunga tymi, duke dëshmuar se flakët nuk janë shuar dhe përhapen me ritëm të lartë.
Fshatrat Shëmbërdhenj dhe Bletas janë shkatërruar plotësisht, ndërsa rreziku mbetet i lartë për Harunas, Nartë, Shelcan, Bulçar, Snosëm, Sojnik, Probat dhe Grabovën e Poshtme.
Terreni malor i vështirë dhe temperaturat e larta po vështirësojnë ndërhyrjen e autoriteteve dhe forcave të emergjencës, të cilat vijojnë përpjekjet për të frenuar përhapjen e flakëve.
Deri tani, është konfirmuar vdekja e një personi, ndërsa një tjetër dyshohet i vdekur. Disa banorë kanë pësuar plagë, ndërsa dëmet materiale janë të mëdha dhe të paqarta. Banorët e zonës vazhdojnë të largohen nga banesat, duke marrë vetëm gjërat më të domosdoshme.
Helikopterët e emergjencës civile qëndrojnë në gatishmëri për të transportuar të plagosurit drejt spitalit të Tiranës, ndërsa situata pritet të mbetet kritike edhe gjatë orëve të ardhshme.
