Temperaturat e larta të verës kanë rritur rrezikun e zjarreve në monumentet e kulturës dhe objektet e trashëgimisë në Gjirokastër, përfshirë edhe sitet arkeologjike në Luginën e Drinos.
Vëmendje e veçantë po i kushtohet Parkut Arkeologjik të Antigonesë, një ndër pikat më të rëndësishme të trashëgimisë kulturore në Jug të Shqipërisë.
Për shkak të pozicionit të tij gjeografik dhe bimësisë së dendur që rritet gjatë verës, ky park mbetet i ekspozuar ndaj zjarreve. Si masë parandaluese, gjatë kësaj periudhe janë ndërmarrë punime intensive për pastrimin e territorit nga barishtet e thata dhe bimësia spontane.
“Për të shmangur rrezikun e flakëve, kemi kryer ndërhyrje të shpejta për pastrimin e gjithë sipërfaqes së parkut,” shprehet Ardis Duka, drejtor i DRTK Gjirokastër. Ai shton se në këtë proces është përfshirë edhe komuniteti i zonës së Lunxhërisë, i cili është njoftuar për të bashkëpunuar në parandalimin e zjarreve dhe në ruajtjen e trashëgimisë kulturore.
Krahas masave mbrojtëse, Parku i Antigonesë po përjeton një rritje të dukshme të vizitueshmërisë. Sipas drejtorit të DRTK, këtë sezon është shënuar një rritje me 15% të numrit të turistëve krahasuar me të njëjtën periudhë të vitit të kaluar.
“Antigoneja tërheq grupe turistësh të specializuar dhe të interesuar për arkeologjinë, duke e bërë atë një destinacion gjithnjë e më të rëndësishëm për turizmin kulturor,” thekson ai.
Në të njëjtën kohë, kujdes po i kushtohet edhe siteve të tjera historike në Luginën e Drinos, si Adrianopoli dhe Palokastra, të cilat po monitorohen nga afër për të parandaluar çdo rrezik zjarri gjatë muajve të nxehtë të verës.
