Situata e zjarreve në vend vazhdon të jetë kritike, ndërsa flakët kanë krijuar një gjendje alarmante në Gjorm, në zonën e lumit të Vlorës. Zjarri ka shkrumbuar qindra hektarë tokë, ndërsa është paraqitur një rrezik mjaft i madh edhe për banesat.
Ministri i Mbrojtjes, Niko Peleshi ka thënë se forcat e ndërhyrjes nga toka po shtohen, ndërsa ndërhyrja nga ajri është bërë e vështirë për shkak të erës, megjithëse në Gumenicë helikopteri ka arritur të largojë flakët që mund të preknin banesat.
Peleshi tha se prioriteti kryesor mbetet evakuimi i banorëve që duhet të veprojnë sipas urdhërave të strukturave të Ministrisë së Mbrojtjes.
“Po shtohen forcat e ndërhyrjes nga toka në Gjormë në zonën e lumit të Vlorës, ndërkohë vazhdon shuarja e zjarrit nga ajri, ku deri në këto momente ndërhyrja e helikopterit në Gumenicë ka arritur të largojë flakët e paparashikueshme prej erës që mund të preknin banesat.
Prioriteti kryesor mbetet evakuimi i banorëve të cilët duhet të veprojnë sipas urdhërave të strukturave të Mbrojtjes Civile për evakuim”, ka thënë Peleshi.
Zjarret kanë vazhduar ditën e sotme edhe në Karaburun, ku situata është ende kritike. Po ashtu në gjithë vendin ka ende vatra aktive, që nga Fushë-Arrëzi, deri në Vlorë.
