Zjarret në vendin tonë kanë vazhduar edhe gjatë ditës së sotme, teksa vatra të reja janë shfaqur. Një prej tyre në fshatin Kocul të Vorës, ku zjarri është evidentuar në afërsi të puseve të naftës. Zjarri ka fituar terren ndihmuar edhe nga era, ndërkohë frika është nëse i afrohet puseve dhe pasojat të jenë më të rënda.
Zjarrfikësit e Vlorës i kanë shkuar në ndihmë efektivëve të Selenicës, ndërsa mësohet se nuk ka banesa të rrezikuara.
Mbrëmjen e sotme, prefekti i Vlorës, Flamur Mamaj ka thirrur një mbledhje me emergjencat civile për të korrdinuar punën në luftën ndaj zjarreve.
Ndërkohë, situata është ende kritike në Karaburun, ku zjarri është duke u afruar në pyllin me pisha të parkut. Po ashtu pesë vatra zjarri janë shfaqur sot në Voskopojë, ku edhe aty është rrezikuar pylli me pisha.
Zjarret kanë prekur edhe vendin e quajtur Gizë, në afërsi të fshatit Borizan në Krujë, ku janë djegur shkurre e pemë frutore. Gjithashtu zjarre ka pasur edhe në fshatin Vadhizë të Fierit.
Ministri i Mbrojtjes, Niko Peleshi tha sot se janë arrestuar shumë persona përgjegëjs për zjarret, dhe janë nën hetim të tjerë. Nga Voskopoja, ai u shpreh se zjarret në këtë zonë ishin të qëllimshme, pasi u shfaqën 5 vatra njëkohësisht.
