Një zjarr i fuqishëm ka shpërthyer pasditen e së dielës në malin Vastak, në zonën e Dukatit në Vlorë, duke dalë jashtë kontrollit për shkak të përhapjes së shpejtë.
Flakët janë favorizuar nga era e fortë dhe terreni i thepisur malor, i cili e ka bërë thuajse të pamundur ndërhyrjen e zjarrfikësve nga toka.
Si pasojë, zjarri ka përfshirë një sipërfaqe të konsiderueshme me bimësi dhe zona pyjore, duke shkaktuar dëme të mëdha mjedisore.
Ekipet e emergjencës ende nuk kanë arritur të ndërhyjnë, ndërsa zjarri vijon të përparojë drejt zonave të dendura me pyje, duke rritur ndjeshëm rrezikun për përhapje më të gjerë.
Situata mbetet kritike dhe kërkon mobilizim urgjent të mjeteve ajrore apo forcave shtesë për të shmangur një katastrofë ekologjike në një prej zonave më të pasura natyrore të Vlorës.
