Vijojnë sërisht djegjet e banesave në vendin tonë, këtë herë në Berat. Sipas autoriteteve një vilë 3-katëshe në lagjen e ish/pjeshkores në Berat është përfshirë nga zjarri mbrëmjen e sotme. Zjarri është pikasur fillimisht në një nga dhomat e vilës dhe në një kohë të shkurtër ka përfshirë të gjithë katin e dytë të kësaj vile. Sipas burimeve në vendngjarje, zjarri është vënë nga fëmijët e lagjes.
Menjëherë pas zjarrit në vendngjarje kanë shkuar forcat të shumta të Repartit Zjarrfikës, të cilat kanë mundur të lokalizojnë në kohë flakët e të shuajnë zjarrin.
Mësohet se fëmijët kanë ndezur disa kartona dhe i kanë hedhur brenda në një nga dhomat, nga dritarja që ishte e hapur totalisht. Nuk dihet se përse është bërë ky veprim ,por si pasojë e zjarrit të rënë janë shkrumbuar totalisht orenditë shtëpiake dhe gjithçka që ndodhej në katin e dytë të kësaj vile. Ky kat ishte i vetmi kat i rregulluar dhe funksional për banim pasi kati i parë dhe ai i tretë ishin akoma në rregullim e sipër.
Vila 3-katëshe është në pronësi të shtetasit Raqi Kule, por aty nuk banon asnjeri pasi familjarët jetojnë në Greqi.
Nuk dihet ende nëse zjarri ka qenë i qëllimshëm apo jo, por autoritetet po bëjnë gjithçka për zbardhjen e ngjarjes.
Ndërkohë kujtojmë se disa kohë më parë një banesë në Kamëz u shkrumbua si pasojë e një bombule gazi e cila shpërtheu dhe shkrumboi të gjithë katin e tretë të një pallati.
