Deputetja demokrate Ina Zhupa ka akuzuar drejtorët e Bashkisë Tiranë të arrestuar për aferën “5D” se kanë shërbyer si koordinatorë elektoralë për Erion Veliajn, duke mbledhur vota për të. Në fjalën e saj në Kuvend, Zhupa tha se është e pamundur që Veliaj të mos ketë dijeni për aferën, pasi të arrestuarit ishin njerëzit e tij më të besuar.
“Drejtorët e 5D ishin edhe koordinatorët politik të Veliajt në zgjedhjet e fundit lokale. Me paratë e vjedhura 100% nga tenderat, ata bënë vota për shefin e tyre. Veliaj i kishte njerëzit më të besuar dhe thotë se nuk di gjë?! Pa firmën e Veliaj nuk do kishte asnjë tender, sepse ai është titullari i institucionit,” tha Zhupa.
Ajo theksoi se Bashkia e Tiranës është kthyer në një organizatë kriminale, ku zhduken taksat e qytetarëve.
“E kanë kthyer Bashkinë e Tiranës në një organizatë kriminale, ku zhduken taksat e qytetarëve. T’u japësh ju sot edhe 100 milionë të tjera kredi është njëlloj si t’i varësh ujkut mëlçitë në qafë,” shtoi Zhupa.
Ajo kritikoi gjithashtu Bashkinë për mënyrën e përdorimit të fondeve për transportin e gjelbër dhe për pagesat ndaj inceneratorit të Tiranës.
“Transportin e gjelbër mund ta realizonte Bashkia me paratë që ka, mjafton të mos paguante inceneratorin fantazmë, që është thjesht një fushë me bar. Vetëm në buxhetin e 2024 janë 12 milionë euro për një incenerator fantazmë,” tha Zhupa.
Ajo përmendi se Veliaj dhe deputetët e tij pretendojnë se paratë gjermane nuk vidhen, por theksoi se fondet IPARD janë keqpërdorur, duke shtuar: “Sot, në Ditën e Europës, duhet të turpëroheshit dhe jo të kërkonit më shumë para për organizatën 5D dhe Lali Inceneratorin.”
