Detaje të reja janë zbardhur këtë të mërkurë në lidhje me zhdukjen e Julian Çelës, 10-vjeçarit, i cili prej vitit 2012 nuk dihet se ku ndodhet. Julian Çela është djali i zv/drejtorit në Drejtorinë Kundër Terrorit në Shërbimin Informativ, Skënder Çela. Ai u pa për herë të fundit në një qendër interneti në lagjen e tij në Laprakë, e më pas askush nuk di gjë për fatin e tij. Hetuesit e lidhin ngjarjen me detyrën që ushtronte babai i tij në SHISH dhe një dosje që thuhej se do të merrte në dorë së fundmi. Bëhej fjalë për vrasjen dhe më pas djegien e trupit të oficerit madhor të Shërbimit Informativ në Durrës, më 24 Tetor 2011, Isa Çopa. Por dhe me vrasjen e gjyqtarit Skerdilajd Konomit.
Dy letra të shkruara me shkrim dore kanë mbërritur në zyrën e Skënder Çelës, dërguesi ende nuk dihet. Letrat nuk u hetuan kurrë mbi përmbajtjen dhe origjinën e tyre dhe nëse kishte ndonjë bazë vërtetësie në ato thënie. Në njërën prej tyre jepeshin detaje, për zhdukjen e Julianit. Përmbajtjen e njërës prej letrave publikohet për herë të parë shkurtimisht në këtë dokumentar.
“I Dashur Z. Skënder Çela.Unë kam punuar 22 vite në SHISH, ku jam larguar me urdhër politik. Si koleg unë ju njoftoj se djali juaj, Julian Çela, është marrë vetëm disa orë nga Ardian Përrenjasi dhe pastaj nga një makinë e drejtuar nga një polic. Ku i ka thënë Julianit që: ‘Jemi shokë të babit’. ‘Hip, të çojmë ke babi pasi është keq’. Dhe bashkë me një shokun e tij e kanë çuar në Selitë të Vogël. Ku e kanë mbajtur 12 orë në vilën e një personi me pseudonimin ‘Lleshi’, i njohur si kapo i një bande të famshme. Më pas ky person e ka çuar djalin tënd bashkë me një mikun e tij nga Brataj i Vlorës, në një stan bagëtish”, thuhet në letër, në dosjen e siguruar nga emisioni “Në Shënjestër”.
Sipas letrës në vazhdim, që duhet marrë me rezervat e saj, pasi është çuar në këtë stan bagëtish, më pas është nisur me gomone në Itali. Dhe më tej në Zvicër për trafik të organeve, ku të përfshirë sipas letërshkruesit janë edhe personazhe të tjerë të lidhur me ekzekutimin e gjyqtarit Skerdilajd Konomi, në qendër të Vlorës, më 9 Shtator të vitit 2011 për pronat në bregdetin e Durrësit.
