Pothuajse një muaj pas zhdukjes pa gjurmë të Eraldo Muçit, mik i afërt i të ndjerit Aleksandër Sadikaj, hetimet po intensifikohen.
Gazetarja Klodiana Lala raportoi se Gjykata ka lëshuar urdhër për kontroll në pesë banesa të ndryshme, përfshirë edhe shtëpinë e Donald Nelës, i njohur me pseudonimin “Tupja”.
Sipas burimeve, Nela ka qenë personi i fundit që ka pasur kontakt me Muçin para se ai të zhdukej.
Denoncimi për zhdukjen e 30-vjeçarit është bërë nga prindërit e tij, të cilët kërkojnë me ngulm nga autoritetet hetimin e plotë të rrethanave dhe zbardhjen e fatit të të birit.
Sipas dëshmive të mbledhura, ditën që humbi kontaktet, Eraldo ndaloi fillimisht në fermën e kuajve që i përket familjes Sadikaj, e më pas u nis drejt Durrësit.
Ai është parë për herë të fundit në autostradën Durrës-Tiranë, ku më pas gjurmët i humbën plotësisht.
Familjarët kanë shprehur dyshime të forta se Muçi mund të jetë bërë viktimë e një ngjarjeje të rëndë kriminale të lidhur me hakmarrje, ndërsa policia po shqyrton disa pista hetimi.
Eraldo Muçi njihej si një nga personat më të afërt të Aleksandër Sadikajt, i cili u vra në qershor të vitit 2022 në një atentat mafioz me tritol në zonën e TEG-ut.
Vrasja e tij shënoi përshkallëzimin e konfliktit mes grupit që ai drejtonte dhe grupit kundërshtar të vëllezërve Edmond Papa dhe Kristo Qirici, një përplasje që më pas solli një varg ngjarjesh të përgjakshme.
Pas vrasjes së Sadikajt, u ekzekutua edhe Edmond Papa, ndërsa kushërinjtë e Sadikajt, Adriatik dhe Zamir Kalemi, iu shpëtuan disa atentateve në Greqi dhe Tiranë.
Më pas, në atë që u cilësua si masakra e Memaliajt, u vra babai i tyre, Shyqyri Kalemi, së bashku me një kamarier dhe një klient të rastësishëm në një lokal.
Hetimet për zhdukjen e Eraldo Muçit po konsiderohen nga autoritetet si pjesë e kësaj zinxhiri të gjatë përplasjesh të dhunshme mes dy grupeve kriminale rivale.
