Gjatë seancës së zhvilluar në Gjykatën e Posaçme për rrëmbimin dhe vrasjen e Jan Prengës, ku Dritan Rexhepi dëshmoi për herë të parë, SPAK paraqiti prova të reja që lidhen me çështjen.
Prokurorja Elida Kaçkini dorëzoi komunikime të siguruara nga aplikacioni i koduar Sky ECC, për të cilat tha se janë mes të pandehurve Dritan Rexhepi dhe Altin Hajri. Sipas saj, këto biseda janë zhvilluar në vitin 2020 dhe kanë rëndësi të veçantë për hetimin.
“Komunikimet kanë ardhur nga francezët. Komunikimet i përkasin Dritan Rexhepit dhe Altin Hajrit. Këto prova kanë ardhur së fundmi, ndaj kërkojmë t’ia paraqesim gjykatës. Do kërkonim te mos bëheshin publike. Komunikimet i përkasin periudhës së vitit 2020. Kanë të bejne pikërisht me çështjen penale, interesimin e tyre të vazhdueshëm për këtë çështje, çfarë ka ndodhur etj etj.”
Shtyhet seanca për në 7 maj. Ndërkohë, është dhënë edhe një urdhër për shoqërimin e detyrueshëm të Aldo Manjishtës, i cili nuk ishte i pranishëm në seancën e sotme.
