Ditën e sotme Sekretari i Përgjithshëm i Partisë së Lirisë Tedi Blushi me anë të një postimi në rrjetin social Facebook është shprehur në lidhje me betonizimin dhe zhdukjen e hapësirave të gjelbëra në kryeqytet. Sipas tij betonizimi dhe zhdukja e gjelbërimit është një nga krimet më të shëmtuara që Edi Rama dhe Erion Veliaj kanë bërë ndaj Tiranës. Blushi tha se misioni i vetëm i Rilindjes për Tiranën është shkatërrimi i hapësirave publike përmes babëzisë, paligjshmërisë dhe korrupsionit. Kujtojmë se disa ditë më parë Kreu i Partisë së Lirisë Ilir Meta prezantoi drejtuesit e njësive për Tiranën.
Postimi i plotë:
Betonizimi dhe zhdukja e gjelbërimit është një nga krimet më të shëmtuara që Edi Rama dhe Erion Veliaj kanë bërë ndaj Tiranës.
Këto pamje të filmuara nga i njëjti kënd, por në dy kohë të ndryshme (maj 2020 dhe shtator 2022) tregojnë qartë se çfarë barbarie ka ndodhur me gjelbërimin prapa ish-Sheratonit nga Rilindja, kjo armike e gjelbërimit dhe e mjedisit.
Masakra e Parkut të Liqenit Artificial është vetëm një provë se si Rama dhe Veliaj kanë mbushur xhepat me paratë e betonit duke bërë trafik me mushkëritë e banorëve të kryeqytetit.
Shkatërrimi i hapësirave publike nëpërmjet babëzisë, paligjshmërisë dhe korrupsionit është i vetmi mision që Rilindja ka për Tiranën.
