Pas zhdukjes misterioze të biznesmenit italian Davide Pecorelli, dhe gjetjes së makinës së tij të djegur në një zonë në Pukë, detaje të reja kanë dalur në dritë.
Gazetarja Klodiana Lala, ka rrëfyer se vetë ajo ka folur me partneren e biznesmenit të zhdukur italian, Davide Pecorelli.
E ftuar në “Open”, Lala u shpreh se Pecorelli ka shkuar fillimisht në Vlorë dhe është takuar me partneren e tij shqiptare, me të cilën ka edhe një fëmijë, më pas është nisur drejt Veriut të Shqipërisë.
Sipas Lalës, partnerja e Pecorellit është nisur më pas për në Perugia, ndërsa vetë Pecorelli ka shkuar drejt Pukës dhe Shkodrës, për të eksploruar zonat për mundësi biznesi.
Gazetarja shtoi se në lidhje me këtë rast, po shkohet drejt ngjarjes aksidentale pasi nuk janë gjetur mbetje lënde djegëse.
“Nga ekzaminimet është gjetur një orë dhe telefon gjysmë i djegur. Natën ku u mor me qira automjeti ishte një nga ditët kur pati përmbytje. Vetëm të nesërmen u panë mbetjet e trupit. Policia këtu duhet të ishte më transparente, se nuk dha asnjë shpjegim që aty kishte skelet njeriu.
Në fillim ai ishte në Vlorë për të takuar bashkëjetuesen pasi ka një fëmijë me të, po pastaj ajo iku në Perugia. Unë e kam takuar personalisht dhe kam folur me të. Ajo tha se ai nga Rinasi ka shkuar në Vlorë pasi thotë se do kishin një biznes atje, më pas ka shkuar në veri për të eksploruar zonën për një mundësi biznesi gjithashtu.
Pecorelli ka shkuar edhe në Shkodër, edhe aty ku u gjet makina. Tashmë nga vrasja po shkohet drejt ngjarjes aksidentale, sepse makina është djegur ngadalë, s’ka gjurmë mbetjesh lënde djegëse,”- tha Lala./Gazetareforma.com/
