Është marrë vendimi, nuk ka zgjedhje të parakohshme në Kosovë.
Gjykata Kushtetuese në Kosovë e ka quajtur të drejtë vendimin e presidentit Hashim Thaçi për t’i dhënë mandatin për formimin e qeverisë së re Avdullah Hotit nga radhët e Lëvizjes Demokratike të Kosovës.
Tashmë me këtë vendim Avdullah Hoti së bashku me AAK dhe Nismën mund të formojnë qeverinë e re të Kosovës.
Kujtojmë se vendimi i Thaçit ishte ankimuar nga lëvizja Vetëvendosje, e cila refuzoi të dërgonte një emër tjetër për kryeministër pas rrëzimit të qeverisë Kurti në Kuvend dhe që kërkonte mbajtje të zgjedhjeve të reja.
Trupa gjykuese ka marrë vendim edhe sa i përket afatit që ka mandatari për krijimin e qeverisë, pro kësaj kanë votuar 7 gjykatës, 2 kanë dalë kundër.
Të gjitha partitë politike përveç LVV kanë kërkuar formimin e një qeverie të re, ndërsa kanë theksuar se do të pranojnë çdo vendim të Gjykatës Kushtetuese.
Presidenti Thaçi mandatoi më 30 prill Avdullah Hotin nga Lidhja Demokratike e Kosovës për të formuar një qeveri të re dhe Lëvizja Vetëvendosje kërkoi nga Gjykata Kushtetuese që të vlerësojë kushtetutshmërinë e veprimit të presidentit.
Para vendimit të Kushtetueses, mbështetës të VV-së organizuan sot pasdite në sheshet qendrore të Prishtinë, siç thanë ata, “provë proteste” duke kërkuar zgjedhje të reja.
