Sekretari i Përgjithshëm i Partisë Demokratike, Gazment Bardhi ka deklaruar sot nga takimi me të rinjtë e PD-së në degën 7 të Tiranës se zërat se Basha ka pranuar tryezën me Ramën nuk janë të vërteta. Ndër të tjera ai është shprehur edhe pse jemi në opozitë, sërish të rinj e të reja po i bashkohen siglës së demokratëve.
“Mirënjohje të thellë të gjithë anëtarëve të rinj të PD-së, që bashkohen në një betejë të vështirë që kemi nisur, jo për PD-në, por për Shqipërinë dhe shqiptarët. Ne nuk ofrojmë as vende dhe as privilegje. Ju i bashkoheni në një moment kur Shqipëria ka një kryeministër me tipare diktatoriale, ndaj dhe bashkimi juaj na jep më shumë energji, na rrit, por i tregon Shqipërisë se nuk keni frikë nga Rama. I bashkoheni PD-së në misionin për çlirimin e vendit nga një qeveri kriminale. PD-ja e ka kuptuar se me Edi Ramën dhe qeverisjen e tij të korruptuar e kriminalizuar nuk negociohet. Për sa kohë që Rama është në qeveri, dera e BE është e mbyllur për Shqipërinë. Ne kemi lindur si parti që e duam Shqipërinë si Europa dhe ky nuk është një slogan.”
“Sa kohë Rama të jetë kryeministër nuk bëjmë me të as diskutime e as marrëveshje. Madje as në tryeza ku ulet Rama si kryeministër.”- theksoi Bardhi
