Ministrja e Shëndetësisë dhe Mbrojtjes Sociale, Ogerta Manastirliu ditën e sotme ka ndjekur nga afër procesin e vaksinimit në “Air Albania”. Manastirliu ka lajmëruar se fasha e vaksinimit do të zgjerohet duke përfshirë edhe punonjësit e shërbimeve dhe institucionet që kanë kontakt të drejtpërdrejtë me qytetarët. Gjithashtu ajo u shpreh se ritmi i vaksinimit po ecën me ritme të larta dhe po synohet të rritet më tej, me vaksinimin e kombinuar, si pjesë e planit kombëtar të vaksinimit masiv.
“Kemi kryer më shumë se 900 mijë vaksinime. Ritmi është goxha i mire, por kemi mundësi akoma më shumë për të rritur këtë ritëm, në mënyrë që të arrijmë një mbulesë vaksinale sa më të lartë. Plani i kombinuar i vaksinimit është duke vazhduar edhe me institucionet kritike si OSHEE, të transportit, ujësjellësit si dhe institucione të cilat kanë kontakte direket me qytetarët, siç janë bashkitë, siç është qendra e shërbimeve ADISA dhe institucione të tjera të cilat janë përfshirë në planin tonë të vaksinimit”, tha ministrja e Shëndetësisë, Ogerta Manastirliu.
Ndër të tjera ajo ka folur edhe për situatën e epidemisë në vendin tonë, Manastirliu ka bërë thirrje për vigjilencë dhe ka theksuar se do të intensifikohet programi i vaksinimit.“Pavarësisht se jemi në një situatë shumë të kontrolluar të epidemisë në vend, kjo nuk do të thotë se duhet të ulim vigjilencën, e aq më pak, ritmin e vaksinimit”, tha Manastirliu
Kujtojmë se prej fillimit të vaksinimit në vendin tonë janë kryer në total 901,429 doza të vaksinës ndaj COVID19. Prej tyre 375,629 qytetarë i kanë marrë të dyja dozat e vaksinës antiCOVID. Aktualisht është hapur fasha e vaksinimit për qytetarët +50 vjeç, ndërsa vijon vaksinimi i kombinuar edhe me grupet e riskut. Procesi i vaksinimit po kryhet sipas të gjithë parametrave të sigurisë dhe cilësisë nga ekipe të trajnuar vaksinatorësh në të gjithë vendin.
