Komisioni Qendror i Zgjedhjeve (KQZ) ka përditësuar rezultatet e votave me postë të numëruara deri më tani për zgjedhjet parlamentare të 9 shkurtit.
Deri në orët e para të së hënës, me mbi 66 përqind të vendvotimeve të numëruara, Lëvizja Vetëvendosje (LVV) kryeson me 52.72 përqind të votave, ndërsa Lidhja Demokratike e Kosovës (LDK) renditet e dyta me 29.8 përqind.
Pas tyre, Partia Demokratike e Kosovës (PDK) ka 7.98 përqind dhe koalicioni mes Aleancës për Ardhmërinë e Kosovës (AAK) dhe Nismës Socialdemokrate është në vendin e katërt me 3.32 përqind.
Numërimi i votave me postë, që ka nisur më 28 shkurt, ka përfshirë më shumë se 63.000 pako me fletëvotime.
Po ashtu, për herë të parë, qytetarët kanë mundur të votojnë fizikisht në disa përfaqësi diplomatike, ku Lëvizja Vetëvendosje ka marrë më së shumti vota, me 12.261 vota, që përbëjnë 80.71 përqind.
Pas përfundimit të numërimit të votave me postë, do të vazhdojë numërimi i votave me kusht dhe atyre të personave me nevoja të veçanta, duke mundësuar përfundimin e procesit dhe hapjen e mundësisë për formimin e institucioneve të reja.
Në rezultatet preliminare të votimit të rregullt, LVV kryeson me 40.80 përqind të votave, e ndjekur nga PDK me 22.05 përqind, LDK me 17.64 përqind dhe AAK me 7.46 përqind.
Sipas këtyre të dhënave, asnjë parti nuk ka arritur shumicën e nevojshme për të formuar qeverinë. Nga partitë serbe, Lista Serbe ka marrë 4.62 përqind të votave.
