Presidentja e Kosovës, Vjosa Osmani ka deklaruar se zgjedhjet lokale në Kosovë nuk do të shtyhen, pasi palët politike nuk kanë rënë dakord. Zgjedhjet në Kosovë do të mbahen në datë 17 tetor dhe më herët kryeministri i Kosovës, Albin Kurti, kërkoi shtyrjen e tyre.
Osmani në një konferencë për mediat pas përfundimit të takimit me subjektet politike, ka deklaruar se Instituti i Shëndetit Publik në Kosovë, ka kërkuar shtyrjen e zgjedhjeve lokale, për shkak të situatës së rënduar nga COVID-19.
Ajo ka thënë në konferencën për mediat se palët nuk kanë rënë dakord dhe zgjedhjet do të mbahen. Në këtë mënyrë rregullat e vendosura nga Instituti i Shëndetetit Publik nuk zbatohen.
“Përkundër rekomandimeve të IKSHP-së për shtyrje të zgjedhjeve, mendimi mbizotërues i subjekteve politike opozitare ishte kundër shtyrjes së zgjedhjeve. Unë mendoj se ky mendim mund të ketë pasoja për shëndetin e qytetarëve. Jam për një shtyrje sado të shkurtër të zgjedhjeve, që do të ishte në mbrojtje të qytetarëve tanë. Meqenëse Kushtetuta është e heshtur për shtyrjen e zgjedhjeve dhe mundësia e vetme është gjetja e konsensusit mes palëve, që në këtë moment mungon, unë i ftoj të gjitha subjektet politike, sidomos ata që nuk i kanë respektuar masat deri më tani, që t’i respektojnë masat përgjatë ditëve në vijim, deri më 17 tetor. Nëse ka eskalim të gjendjes, ne do të ulemi sërish e do të diskutojmë për datën e zgjedhjeve. Do ta shohim me kujdes situatën dhe nëse do të ketë situatë të rënduar, do të ulemi të diskutojmë sërish, por për momentin data e zgjedhjeve mbetet 17 tetori”, është shprehur Presidentja Vjosa Osmani.
