Ditën e sotme po mbahen zgjedhjet lokale, ku që në orët e para të procesit zgjedhor janë evidentuar problematika të shumta me pajisjen “PEI” të identifikimit të votuesve.
Teksa në shumë qendra votimi, pajisja “PEI” nuk ka funksionuar për asnjë votues, në disa të tjera ka shfaqur probleme për votuesit mbi 70 vjeç.
Raportohen raste të shumta kur gishti i votuesve të kësaj grupmoshe është vështirë të identifikohet. Mësohet se si shkaku kryesor mbeten kallot në duart e votuesve, që e veshtirësojnë identifikimin e tyre. Në këto raste ndiqen hapat manual dhe sërish ata ushtrojnë të drejtën e votës, përpos faktit që si kosto në këtë rast është koha e shpenzuar.
“Gazeta Reforma” mëson se këto problematika janë ndeshur masivisht në qendrat e votimit në vend, po kryesisht në zonat ruale të Fierit, Dibrës, Kukësit, apo dhe të Durrrësit. Madje raste të tilla paraqiten dhe në kryeqytet. Në fakt, kjo problematikë është shfaqur edhe në zgjedhjet e kaluara parlamentare që u zhvilluan më 25 prill 2021, ku po ashtu u përdor pajisja elektronike për të identifikuar qytetarët.
Kujtojmë që duke ndjekur problematikat e krijuara në qendra të ndryshme të votimit me pajisjen e identifikimit biometrik ‘PEI’, KQZ ka urdhëruar që të vazhdohet me identifikimin e zgjedhësve me anë të listave të votimit të printuara./Gazeta Reforma
