Në prangat e Policisë së Kosovës, kanë rënë katër persona pasi dyshohet se kanë blerë vota. Sipas njoftimit zyrtar të policisë, arrestimet janë bërë që mbrëmjen e djeshme.
“Prokurori i Shtetit në bashkëpunim me Policinë e Kosovës, njoftojnë opinionin publik se mbrëmë më 16 tetor 2021 në orët e vona, janë arrestuar katër (4) persona në Kllokot, me inicialet A.D., M.K., A.T dhe Xh.B., në lidhje me procesin zgjedhor dhe me këtë dyshohet se kanë kryer veprat penale “Cenim i përcaktimit të lirë të votuesve” nga neni 210 i KPRK-së dhe “Dhënia ose marrja e ryshfetit në lidhje me votimin” nga neni 212 i KPRK-së. Katër të dyshuarit e arrestuar me urdhër të prokurorit të Shtetit janë dërguar në mbajtje për 48 orë”, thuhet në njoftimin.
Kujtojmë se ditën e sotme në Kosovë po mbahen zgjedhjet lokale në të gjitha komunat e vendit. Qendrat e votimit janë hapur në orën 07:00 dhe pritet të mbyllen në ora 19:00, ndërsa në këto zgjedhje janë 166 kandidatë për postin e kryetarëve të komunave, 152 burra dhe 14 gra. Numri i kandidatëve për kuvende komunale është 5,198, prej tyre 3,261 burra dhe 1,937 gra. Numri i përgjithshëm i kandidatëve të certifikuar është 5,364. Zgjedhjet do të monitorohen nga mijëra vëzhgues të vendit si dhe Bashkimi Evropian ka dërguar një mision për vëzhgimin e zgjedhjeve lokale.
