Zgjedhjet lokale të 30 qershorit po afrojnë dhe ndërkombëtarët kanë nisur përgatitjet për t’i monitoruar nga afër këto zgjedhje.
Sipas burimeve të “tch” theksohet se kreu i misionit afatgjatë të monitorimit për zgjedhjet lokalet të 30 qershorit do të jetë britanikja Audrey Frances Glover, një emër jo i panjohur për zgjedhjet shqiptare.
Katya Andrus zëdhënëse e OSBE dhe ODIHR, ka theksuar se:
“ODIHR do të ketë 18 vëzhgues afat gjatë dhe ne kemi kërkuar 250 vëzhgues afat shkurtër të cilët do të monitorojnë zgjedhjet në të gjithë vendin. Ne jemi të mirëinformuar për zhvillimet e fundit dhe po bëjmë një monitorim të kujdesshëm të zhvillimeve”.
Emri i Glover nuk është i panjohur për politikën shqiptare, pasi ajo ka monitoruar zgjedhjet që ato të 26 majit të vitit 1996, të cilat u cilësuan si të manipuluara, duke kërkuar përsëritjen e votimeve në disa zona zgjedhore.
Pikërisht këto zgjedhje problematike, të raportuara nga ana e ndërkombëtarëve, bëri që Berisha të përfshinte ambasadoren Glover në listën e njerëzve të “padëshirueshëm”.
Gjashtë vite më parë, Glover u caktua në krye të misionit të ODIHR-it për të monitoruar zgjedhjet parlamentare të vitit 2009. Por kjo u kontestua nga ana e Kryeministrit të asaj periudhe, Sali Berisha, i cili pati paraqitur një ankesë zyrtare, që kontestonte caktimin e ambasadores britanike në këtë detyrë.
Zgjedhjet lokale të 21 qershorit 2015 e risollën përsëri në Shqipëri ambasadoren Gllover bashkë me 250 vëzhgues ndërkombëtarë.
Për të katërtën herë ambasadores britanike do t’i duhet të vihet në krye të monitorimit të zgjedhjeve në Shqipëri atyre të 30 Qershorit, të cilave i ka paraprirë një situatë politike e tensionuar.
Nga njëra anë opozita që thotë se më 30 Qershor nuk do të ketë zgjedhje nga ana tjetër kryeministri Edi Rama i cili tha një ditë më parë se në Shqipëri ka 5500 qendra votimi, dhe mbi të gjitha edhe shumë nga ata deri ditën e zgjedhjeve do të jenë informuar plotësisht se çfarë të ndodh nëse prek procesin zgjedhor.
E ka Kodi Penal i Republikës së Shqipërisë do të theksonte kryeministri Rama. Është shumë i qartë. Është shkruar bashkërisht me Partinë Demokratike kujtoi kryeministri, kur Partia Demokratike ishte në qeveri dhe është një nga produktet më solide të konsensusit politik, se çfarë duhet t’i ndodhë dikujt që prek zgjedhjet.
