Në zgjedhjet e parakohshme parlamentare në Gjermani, që do të mbahen të dielën më 23 shkurt, rreth 7 milionë votues me origjinë të huaj do të kenë mundësinë të ndikojnë në rezultatin politik.
Në total, pritet që rreth 60 milionë qytetarë t’i drejtohen kutive të votimit, ndërsa numri i votuesve me sfond migracioni është rritur ndjeshëm vitet e fundit.
Sipas një studimi të fundit nga Qendra Gjermane për Studimet e Migracionit dhe Integrimit (DeZIM), shqetësimet e migrantëve nuk ndryshojnë shumë nga ato të gjermanëve pa sfond migracioni.
Problemet kryesore për të gjithë votuesit mbeten inflacioni, çmimet e larta të energjisë dhe ushqimeve, siguria dhe perspektiva ekonomike. Megjithatë, personat me origjinë të huaj shpesh shprehin më shumë frikë nga dhuna dhe ndihen më të pasigurt financiarisht, veçanërisht në lidhje me pensionet dhe çështjet e banimit.
Një tjetër shqetësim që ndikon në këtë grup votuesish është konflikti në Lindjen e Mesme, i cili për 43% të të anketuarve ka një ndikim të madh.
Një tendencë e theksuar nga studimi është se qytetarët me sfond migracioni shkojnë më rrallë në votime krahasuar me ata që nuk kanë rrënjë të huaja. Për shembull, gjermano-turqit, një nga grupet më të mëdha të migrantëve në vend, tradicionalisht mbështesin Partinë Socialdemokrate (SPD), por pjesëmarrja e tyre në votime mbetet e ulët.
Cilat parti kanë më shumë mbështetje nga migrantët?
Edhe pse nuk ka një bllok votues të unifikuar, disa parti gëzojnë më shumë mbështetje nga qytetarët me sfond migracioni:
• SPD (Socialdemokratët) – 76%
• CDU/CSU (Demokratët e Krishterë) – 71%
• Të Gjelbrit – 57%
• FDP (Liberalët) – 53%
• AfD (Alternativa për Gjermaninë, e djathta ekstreme) – 21%
AfD ka mbështetje më të ulët në këtë grup votuesish, sidomos tek ata me origjinë nga BE, Lindja e Mesme dhe Afrika e Veriut. Megjithatë, ruso-gjermanët janë një nga grupet që kanë prirje më të madhe për të mbështetur këtë parti.
Duke qenë se numri i votuesve me sfond migracioni po rritet, partitë gjermane janë duke intensifikuar përpjekjet për të tërhequr këtë elektorat.
Ato organizojnë takime në shoqata, xhami dhe aktivitete komunitare, si dhe përdorin gjuhët e ndryshme të migrantëve për të komunikuar mesazhet e tyre.
Një fenomen interesant është se edhe AfD, ndonëse ka një retorikë kundër migrantëve, po përpiqet të tërheqë votues me origjinë të huaj, veçanërisht në rrjetet sociale si TikTok. Kjo është vërejtur edhe tek një pjesë e të rinjve me origjinë turke, të cilët, përkundër retorikës së partisë, kanë filluar të simpatizojnë me të.
Në një klimë politike të tensionuar dhe me një ekonomi në vështirësi, vota e migrantëve në këto zgjedhje mbetet një faktor i rëndësishëm, edhe pse pjesëmarrja e tyre në votime është ende më e ulët se mesatarja kombëtare./DW
