Presidenti Ilir Meta, ka ftuar kryeministrin Rama dhe kreun e opozitës në Presidencë për nisjen e konsultimeve rreth caktimit të datës për zgjedhjet e ardhshme parlamentare të vitit 2021.
Sipas marrëveshjes së 5 qershorit të arritur në Këshillin Politik dhe miratimin e Reformës Zgjedhore, është dakordësuar që periudha zgjedhore të zgjasë nga 15 prilli deri në 15 maj ose nga 1 tetori deri në 30 tetor.
Presidenti në letrën drejtuar kreut të Grupit Parlamentar të Partisë Socialiste, Taulant Ballës, ka ftuar kryeministrin Rama apo persona të tjerë të caktuar prej tij, që të jenë të pranishëm ditën e premte në Presidencë.
Pritet tashmë të shihet lëvizja e Ramës, nëse do të shkojë vetë në Presidencë apo do të dërgojë një person të autorizuar nga ai.
Sipas gjasave mëkëmbës i Ramës në tryezën e konsultimeve në Presidencë, mund të jetë përfaqësuesi i PS-së në Këshillin Politik dhe kreu i Komisionit për Reformën Zgjedhore, Damian Gjiknuri.
Ndërkohë nga ana tjetër kreu i Partisë Demokratike, Lulzim Basha, e ka konfirmuar pjesëmarrjen.
Kujtojmë se zgjedhjet parlamentare të vitit 2021 pritet të zhvillohen në muajin prill, pasi edhe gjatë mbledhjeve të Këshillit Politik, parimisht është rënë dakort që zgjedhjet të mbahen sa më shpejt.
