Organizata e minoritarëve grekë dhe emigrantëve Shqiptarë në Greqi, i kanë bërë thirrje qeverisë greke që të lehtësoj masat për pikën kufitare të Kakavijës. Kjo kërkesë bëhet për shkak të zgjedhjeve elektorale që zhvillohen më 25 prill.
Sipas Epiruspost.gr, kërkesa ka shkuar në qeverinë greke dhe kërkohet që këtë fundjavë të caktohen kushtet përkatëse që votuesit të kenë mundësi të vijnë të votojnë në Shqipëri. Deri më tani nuk ka asnjë reagim nga qeveria greke lidhur me kërkesën e bërë dhe nuk dihet nëse do të shqyrtohet apo jo, ndërsa koha është e limituar sepse kanë ngelur vetëm 6 ditë nga zgjedhjet.
Më herët me anë të një njoftimi, policia kufitare shtyu hapjen e kufirit me Kapshticën deri më datë 26 prill. Autoritet e Policisë Greke, në vijim të masave të marra nga qeveria greke, për përballimin e situatës së krijuar nga pandemia globale COVID-19, kanë njoftuar që shtyhet afati i hapjes së kufirit me vendin tonë. Policia njofton se deri në këtë datë , dalja nga Shqipëria dhe hyrja drejt Greqisë nëpërmjet pikës kufitare të Kapshticës do të jetë e mbyllur. Ndërsa dalja nga Greqia dhe hyrja drejt vendit tonë do të jetë e hapur për çfarë do lloj kategorie, do të jetë e lejuar nga ora 06:00 deri në orën 22:00.
Kujtojmë se pak më parë edhe Komiteti Teknik i Eksperteve vendosi karantinë të detyruar dy javore, për personat që vijnë nga Maqedonia e Veriut dhe Greqia. Kjo ndikon direkt tek emigrantët që duan të vijnë në vendin tonë për të dhënë votën, por nuk kanë se si sepse duhet të qëndrojnë në karantinë të detyruar.
