Javën e ardhshme 65 vëzhgues nga Asambleja Parlamentare e OSBE pritet të vijnë në Shqipëri për zgjedhjet e përgjithshme të 25 Prillit.
Vëzhguesit do të punojnë me kolegët nga Zyra e OSBE-së për Institucionet Demokratike dhe të Drejtat e Njeriut dhe Asamblesë Parlamentare të Këshillit të Evropës.
Personi që do të shërbejë si Koordinator Special dhe drejtues i misionit vëzhgues, do të jetë Azay Guliyev, Shefi i Delegacionit të Azerbajxhanit dhe Nënkryetari i PA-së së OSBE-së. Ai u emërua nga Kryetari i Përgjithshëm i Zyrës, Ministri Suedez për Punë të Jashtme Ann Linde.
“Ne po presim me padurim të punojmë ngushtë me partnerët tanë të kahershëm, Zyrën e OSBE-së për Institucionet Demokratike dhe të Drejtat e Njeriut dhe Asamblenë Parlamentare të Këshillit të Evropës dhe të japim kontributin tonë në shoqërimin e rrugës demokratike të Shqipërisë. Këto zgjedhje janë një mundësi e rëndësishme për Shqipërinë për të demonstruar angazhimin e saj për zhvillimin demokratik dhe reformën”, tha Guliyev.
Zgjedhjet do të vlerësohen kundrejt angazhimeve demokratike të përfshira në Dokumentin e OSBE-së të Kopenhagenit 1990. Vëzhguesit do t’i kushtojnë vëmendje të veçantë mjedisit të fushatës, kornizës ligjore, administrimit të zgjedhjeve, procedurave të ditës së zgjedhjeve dhe mbulimit nga media. Deklarata paszgejdhore me konkluzionet paraprake do të paraqitet në një konferencë shtypi në 26 prill në Tiranë.
