Një incident është shënuar në Fier gjatë procesit zgjedhor të 11 majit, ku një 101-vjeçare nuk është lejuar të votojë për shkak se emri i saj nuk figuronte në listën e zgjedhësve.
Isuf Nuhaj, djali i saj, denoncoi rastin, duke thënë se e ëma, një votuese e rregullt prej dekadash, ishte paraqitur në shkollën “Naim Frashëri” që në orën 06:30 të mëngjesit, siç e kishte zakon.
Sipas tij, pas një pritjeje prej rreth 30 minutash, u konfirmua se ajo nuk mund të votonte, pasi nuk gjendej në listën e qendrës.
“Shkuam aty ku kemi votuar gjithmonë, por na sollën vërdallë. Më në fund më thanë se nuk figuron,” tha ai, duke e cilësuar të papranueshme që një qytetare 101-vjeçare të përjashtohet nga një proces në të cilin ka marrë pjesë gjithë jetën.
