Fletët e votimit për shqiptarët që jetojnë jashtë vendit, të cilat janë printuar në Slloveni, kanë mbërritur tashmë në Shqipëri në kuadër të zgjedhjeve parlamentare të 11 majit.
Ato janë vendosur në Parkun Olimpik, ku pritet të nisë këtë të mërkurë procesi i përgatitjes së zarfeve që do t’u dërgohen emigrantëve.
Sipas planit, shpërndarja e zarfeve do të përfundojë brenda datës 17 prill. Pasi të jenë dërguar, pritet që zarfi t’u mbërrijë emigrantëve brenda 1 deri në 3 ditë.
I gjithë procesi i përgatitjes së dokumentacionit do të monitorohet në mënyrë të vazhdueshme përmes kamerave sigurie 24-orëshe.
Komisioneri Shtetëror i Zgjedhjeve, Ilirjan Celibashi, u shpreh disa ditë më parë se fletët e votimit për diasporën do të mbërrinin në vend më 7 ose 8 prill, ndërsa nga data 8 deri më 10 prill do të nisë përgatitja e dokumentacionit për votuesit jashtë territorit shqiptar.
Procesi, sipas tij, pritet të përfundojë jo më vonë se data 15 apo, në maksimumi, 17 prill, në mënyrë që votat të kenë kohë të rikthehen në KQZ deri në orën 19:00 të 11 majit.
