Kryeministri Edi Rama zhvilloi sot një mbledhje me drejtuesit politikë të qarqeve, ku foli rreth organizimit të fushatës dhe zgjedhjeve të 25 prillit.
Mësohet se kreu i socialistëve ka paralajmëruar shkarkime për të gjithë ata që nuk punojnë me qytetarët. Në fjalën e tij, Rama ka vënë theksin në vazhdimësinë e takimeve me qytetarët për të rikuperuar “pikët” që mund të jenë humbur.
“Nuk do lejohen në krye të institucioneve ata që nuk punojnë. Rishikim të drejtuesve të institucioneve që nuk kanë kryer punën. Analiza për punën e drejtuesve të institucioneve. Evidentoni drejtorët që nuk iu kanë ofruar shërbim qytetarëve,“-mësohet se është shprehur Rama.
Gjatë takimit, Rama caktoi Ardian Çelën në pozicionin e koordinatorit të qarkut të Durrësit dhe porositi drejtuesit e qarqeve që të bëjnë një rishikim të çdo drejtuesi të institucioneve publike që ka dështuar në punën e tyre. Kryeministri, mësohet t’u ketë thënë që nuk do të lejohet më arroganca e këtyre personave ndaj qytetarëve.
