Gjykata Kushtetuese ka vendosur mbrëmë pro kërkesës së Lëvizjes Vetëvendosje rreth vlefshmërisë së votës së deputetit Etem Arifi për zgjedhjen e Qeverisë Hoti, e që zyrtarisht vendi duhet të shkojë në zgjedhje të reja të parakohshme.
Vota e deputetit Etem Arifi ishte vendimtare për zgjedhjen e Qeverisë Hoti, më 3 qershor.
Gjykata Kushtetuese argumentoi se zgjedhja e qeverisë së Hotit nuk është kryer në kushtet e ligjshmërisë, pasi u provua se deputeti Ethem Arifi, që ishte I domosdoshëm për numrin e votave të qeverisë në 3 qershor të këtij viti nuk mund të votonte.
Presidentja në detyrë Vjosa Osmani ka thirrur sot në mesditë kryetarët e partive parlamentare që të konsultohen për datën e zgjedhjeve, që sipas kushtetutës së Kosovës, do të mbahen brenda 40 ditëve.
Në këtë debat, ka ndërhyrë edhe ambasada e Shteteve të Bashkuara të Amerikës në Kosovë që u ka kërkuar palëve të respektojnë vendimin e Gjykatës Kushtetuese.
“Shtetet e Bashkuara u bëjnë thirrje të gjitha partive politike dhe institucioneve në Kosovë të respektojnë vendimet e Gjykatës Kushtetuese dhe të sigurojnë që qytetarët e Kosovës të kenë mundësinë të zgjedhin përfaqësuesit e tyre përmes zgjedhjeve të lira, të drejta dhe paqësore”, thuhet në njoftimin për shtyp.
Kushtetuesja ka konstatuar se, në bazë të nenit 71.1 të Kushtetutës të Republikës së Kosovës, në ndërlidhje me nenin 29.1 (q) të Ligjit për Zgjedhjet e Përgjithshme, personi i dënuar për vepër penale me një vendim gjyqësor të formës së prerë në tri (3) vitet e fundit, nuk mund të jetë kandidat për deputet e as të fitoj mandat të vlefshëm në Kuvendin e Republikës së Kosovës.
Ndaj ka argumentuar gjykata, qeveria nuk është zgjedhur sipas nenit 95 të Kushtetuës. Zgjedhjet duhet të mbahen jo më vonë se 40 ditë nga dita e shpalljes së tyre.
/Gazetareforma.com/
