SPAK– 8 anëtarët e Prokurorisë së Posaçme Anti Korrupsion janë betuar sot para Presidentit Meta dhe kanë nisur punën.
Pas ceremonisë së betimit ka ardhur edhe reagimi i Shteteve të Bashkuara të Amerikës.
Nëpërmjet një postimi në faqen zyrtare në Facebook Ambasada Amerikane ka treguar se e mbështet këtë vendim.
Gjithashtu ata kanë nënvizuar edhe një herë faktin që janë në krah të atyre që janë angazhuar për t’i sjellë shqiptarëve sistemin etik dhe transparent të drejtësisë.
Postimi i plotë
“Shtetet e Bashkuara qëndruan krah Shqipërisë kur reforma në drejtësi u miratua në 2016-ën. Ne ishim aty kur filloi procesi i vetingut dhe ndërsa themeloheshin këshilli i lartë gjyqësor dhe këshilli i lartë i prokurorisë. Edhe sot, i Ngarkuari me Punë Daniel Koski ishte aty ndërsa tetë prokurorët e rinj të Strukturës së Posaçme Anti-Korrupsion dhe Krim i Organizuar (SPAK) bënë betimin e tyre përpara Presidentit Ilir Meta. Shtetet e Bashkuara do vazhdojnë të qëndrojnë në krah të atyre që janë angazhuar për t’i sjellë shqiptarëve sistemin etik dhe transparent të drejtësisë që ata të gjithë meritojnë,”–shkruhet në postimin e Ambasadës.
Struktura e Posaçme kundër Korrupsionit dhe Krimit të Organizuar”, ose SPAK përbëhet nga Njësia e Prokurorisë së Posaçme si dhe Njësia e Posaçme Hetimore me emrin “Byroja Kombëtare e Hetimit”, BKH.
Elida Kaçkini, Enkeleda Millonaj, Edvin Kondili, Behar Dibra, Arben Kraja, Klodian Braho, Ened Nakuçi dhe Altin Dumani janë tetë prokurorët që janë pjesë e këtij institucioni.
Arben Kraja do të jetë drejtuesi i Strukturës së Posaçme Kundër Korrupsionit Dhe Krimit Të Organizuar për 3 vitet e ardhshme pa pasur mundësinë e rikandidimit.
