Presidenti amerikan Donald Trump ka zhvilluar një bisedë telefonike me presidentin rus Vladimir Putin, e cila sipas tij zgjati rreth 15 minuta dhe u përqendrua kryesisht në zhvillimet më të fundit në Ukrainë.
Në një postim në platformën Truth Social, Trump bëri të ditur se temë kryesore ishte sulmi i fundjavës nga forcat ukrainase ndaj disa bazave ajrore ruse, përfshirë ato ku ishin të vendosur bombarduesit strategjikë.
Sipas Trumpit, Putin u shpreh i vendosur për t’i dhënë një përgjigje ushtarake këtij sulmi, duke sinjalizuar se Moska nuk do ta lërë pa pasoja këtë veprim të Kievit.
Megjithatë, Trump theksoi se pavarësisht tonit të ashpër, biseda ishte “e mirë”, ndonëse jo një hap drejt “paqes së menjëhershme”.
Gjatë telefonatës, dy liderët trajtuan edhe çështjen e programit bërthamor të Iranit.
Trump tha se i kishte përcjellë Putinit një mesazh të qartë: “Irani nuk mund të ketë armë bërthamore”. Ai shtoi se të dy janë në një linjë për këtë çështje dhe se Putin është shprehur i gatshëm të angazhohet në dialog me Teheranin për të ulur tensionet.
Trump akuzoi udhëheqjen iraniane se po shtyn qëllimisht marrjen e një vendimi përfundimtar mbi armët bërthamore, ndërsa theksoi nevojën për veprim të shpejtë për të parandaluar një krizë më të madhe.
Kjo është hera e parë që Trump dhe Putin flasin pas më shumë se dy javësh. Telefonata e fundit mes tyre ishte më 19 maj dhe kishte zgjatur dy orë, të cilën Trump atëherë e përshkroi si “të shkëlqyer”.
