Presidenti ukrainas, Volodymyr Zelenskiy shfrytëzoi vizitën e sekretarit amerikan të shtetit, Antony Blinken dhe sekretarit të jashtëm britanik, David Lammy në Kiev, për t’i drejtuar një thirrje të hapur të dy vendeve. Zelenskiy i kërkoi SHBA-së dhe Mbretërisë së Bashkuar që të marrin ‘vendime më të forta’, ndërsa kërkoi leje për të përdorur armë me rreze të gjatë kundër Rusisë.
Gjatë vizitës së përfaqësuesve të lartë amerikan dhe britanik në Kiev, për bisedime me liderët ukrainas, Zelenskiy u shpreh se do të kërkojë leje drejtpërdrejtë nga Blinken dhe Lammy për të përdorur raketa me rreze të gjatë kundër Rusisë.
“Do të kem pak më vonë një bisedë me të (Blinken) dhe ministrin e Punëve të Jashtme për MB. Nuk i di të gjitha detajet e bisedës sonë. Do të jem i gatshëm të jem i hapur dhe i sinqertë pas këtyre konsultimeve.
Nuk mund të them nëse jam optimist për vendimin e tyre për të na dhënë leje për të përdorur raketa me distanca të gjata. Mund të them se është për të ardhur keq që nuk varet nga optimizmi im. Kjo varet nga optimizmi i tyre. Për ne është shumë e rëndësishme dita e sotme. Gjithsesi, do t’jua them pas takimit gjithçka ndodhi, ndërsa më duhet të theksoj se shpresoj në një komunikim timin me Presidentin (Joe) Biden këtë muaj”, tha Zelensky
Ai u shpreh se ka një “plan fitoreje” që dëshiron t’ia paraqesë Joe Biden këtë muaj, plan i cili do të forconte Kievin.
“Nëse partnerët e mbështesin planin, do ta bëjë më të lehtë për Ukrainën që të detyrojë Rusinë t’i japë fund luftës”, tha presidenti ukrainas.
“Për çfarë është ky plan? Është një fuqizim serioz i Ukrainës dhe, për mendimin tim, do të ketë ndikim psikologjik dhe politik në vendimin e Rusisë për t’i dhënë fund kësaj lufte”, u shpreh ai.
Ndërkohë, një sirenë sulmi ajror mund të dëgjohej në qendër të Kievit vetëm pak çaste përpara se sekretari i jashtëm britanik të shfaqej në vendndodhjen e tij.
Një fotograf lokal aty pranë i tha mediave se “e kam dëgjuar shumë herë. E dëgjoj çdo ditë këtë sirenë”
Njerëzit vazhduan të bënin jetën e tyre të përditshme derisa sirena u ndal disa minuta më vonë, raportoi PA Media.
