Zëdhënësi i Presidenti Ilir Meta ka bërë me dije se presidenti do të votojë nesër sapo të fillojë procesi zgjedhor në orën 7:00 të mëngjesit. Në një status në Facebook tedi Blushi shkruan se do të votojë në Qendrën e Votimit në Kopshtin nr.31 në rrugën “Pjetër Bogdani”. Ai thotë se prej aty do të japë një mesazh mjaft të rëndëshishëm për qytetarët e Republikës.
Ndër të tjera ai u bën thirrje gjithë qytetarëve që nesër të marshojnë të qetë e me vendosmëri drejt kutive të votimit për të vulosur ndryshimin historik për të ardhmen europiane të Shqipërisë. Blushi shkruan se dita e nesërme do të jetë një festë demokracie.
Ndërkohë Meta ka dhënë vazhdimisht mesazhe gjatë ditës së sotme për ata që do të cenojnë procesin e votimit dhe ata që nuk i hetojnë këto shkelje.
Postimi i plotë i Tedi Blushit:
Nesër, në ora 07:00, Presidenti i Republikës, Sh.T.Z Ilir Meta do të votojë në Qendrën e Votimit, në Kopshtin nr.31, Rruga “Pjetër Bogdani”, Tiranë, nga ku do të japë edhe një mesazh tepër të rëndësishëm për të gjithë qytetarët e Republikës.
Presidenti Meta u bën thirrje të gjithë shqiptarëve të marshojnë të qetë dhe me vendosmëri drejt kutive të votimit për të vulosur ndryshimin e rëndësishëm, të shumëpritur dhe historik për të ardhmen europiane të Shqipërisë.
Nesër do të jetë një Festë e Demokracisë. 🇦🇱
