BE thotë se takimi i nivelit të lartë që pritet të mbahet pas pak ditësh mes Kurtit dhe Vuçiçit është vazhdim i dialogut dhe jo takim për format të ri të negociatave.
Kështu i ka thënë Gazetës Express zëdhënësi i BE-së për Politikë të Jashtme, Peter Stano, pasi është pyetur rreth deklaratës së kryeministrit Albin Kurti se takimi me Vuçiçin nuk do të jetë takim për dialogun por për të diskutuar rreth formatit të ri të tij. akimin me presidentin Vuçiç në Bruksel, kryeministri Kurti nuk e ka cilësuar si takim që e vazhdon dialogun, por vetëm si takim ku do të diskutohet formati i një dialogu të ri.
“Takimi i mesit të qershorit që është paralajmëruar sërish nuk është paraparë të vazhdojë dialogun e moçëm apo me të moçmen por është diskutim mbi formatin dhe ecurinë e bisedimeve në të ardhmen. Pra, nuk është takim i dialogut të ardhshëm për takim për dialogun e ardhshëm. Për këtë format ne duhet të jemi të përgatitur si me platformë ashtu edhe me strategji por nuk jemi në atë fazë. Tash pa u ulur ende në takim për dialog me nxjerr platformë e strategji është gabim në hapa, prandaj nuk bën që para takimit për dialog të nxjerrim platformë e strategji”,- ka thënë Kurti.
Ndërsa Peter Stano, u shpreh: “Rruga drejt Bashkimit Evropian për Kosovën dhe Serbinë kalon nëpër dialogun e lehtësuar nga BE-ja. Ky dialog filloi më 2011 dhe vazhdon me një takim të ri të nivel të lartë, i cili do të ndodhë së shpejti.
Në rrjedhën e këtij procesi të vazhdueshëm, qeveritë në të dyja palët kanë ndryshuar, por zotimet mbeten. Të gjitha çështjet e diskutuara deri më tani dhe që do të diskutohen në të ardhmen brenda kornizës së këtij dialogu të vazhduar janë kyçe për një normalizim gjithëpërfshirës të raporteve mes Kosovës e Serbisë”,- i tha Gazetës Express zëdhënësi i BE-së, Peter Stano.
