Është zbardhur mekanizmi i vrasjes së biznesmenit Eduart Reçi, ndodhur mbrëmjen e 13 nëntorit në rrugën “Faik Konica” në Tiranë.
Sipas hetuesve, autori ka qëlluar nga shkallët e emergjencës, vendi i vetëm që i ofronte fushëpamje për të ndjekur lëvizjet e viktimës.
Ai e ka ekzekutuar Reçin me një plumb në kokë nga një distancë prej 50 metrash.
Autori është identifikuar si Shkëlqim Dukaj, oficer i Policisë Gjyqësore pranë Komisariatit nr. 2 në Tiranë, i cili tashmë ndodhet pas hekurave së bashku me vëllanë e tij, i dyshuar si bashkëpunëtor në këtë krim.
Pas kryerjes së aktit, Dukaj ka zbritur shkallët e emergjencës dhe është larguar duke shfrytëzuar një tunel mes një hoteli dhe lokalit në pronësi të vëllezërve Dukaj.
Ky itinerar ka bërë të mundur që ata të shmangin regjistrimin nga kamerat e sigurisë në zonë.
Hetimet kanë zbuluar se Reçi ishte vëzhguar për gjashtë ditë radhazi para se të vritej.
Madje, më 8 nëntor, Dukaj kishte tentuar të kryente vrasjen, por plumbi nuk kishte kapur objektivin.
Ai nuk ka ngritur dyshime, pasi në zonë janë hedhur fishekzjarrë që të shmangnin vëmendjen nga zhurma në momentin kur do të qëllohej mbi Reçin.
Sipas prokurorisë vëllezërit Duka ishin në konflikt me biznesmenin për një pronë.
