Një tjetër “vatër” prostitucioni është zbuluar në Durrës. Edhe kësaj herë, qendra ishte kamufluar në ambientet e një pallati në lagjen nr.4 të qytetit bregdetar. Nga kontrolli që ka ushtruar Policia, nën hetim kanë përfunduar 4 persona, shqiptarë dhe të huaj. Veçse kjo qendër zbuloi se Shqipëria nuk është kthyer në një ‘parajsë prostitucioni’ vetëm për vajzat që vijnë nga vendet e Amerikës Latine, por edhe Shtetet e Bashkuara të Amerikës dhe Bjellorusia. Dy persona, mes tyre një shqiptar, duket se tutoronin dy të reja, 28 dhe 26 vjeçe, në këmbim të parave. Gjatë kontrollit në banesë u kanë sekuestruar 3 pasaporta, 5 celularë dhe shuma parash të valutave të ndryshme.
NJOFTIMI I PLOTË:
Durrës
Të implikuar në një rast prostitucioni, që kryhej në ambientet e një pallati në lagjen nr. 4, procedohen penalisht 4 shtetas (shqiptarë dhe të huaj). Sekuestrohen 3 pasaporta, 5 celularë dhe shuma parash të valutave të ndryshme të dyshuara të përfituara nga kjo veprimtari kriminale. Specialistët e Seksionit për Hetimin e Trafiqeve të Paligjshme të DVP Durrës, bazuar në informacionet e siguruara nga inteligjenca policore, goditën një tjetër rast të veprimtarisë kriminale të prostitucionit. Për këtë rast u referuan materialet në Prokurori, ku nisën procedimet në gjendje të lirë për shtetasin R. G., 20 vjeç, banues në Durrës, si dhe për shtetasit N. B., 56 vjeç, T. S., 28 vjeçe dhe A. P., 36 vjeçe (me shtetësi amerikane dhe bjelloruse).
Të 4 shtetasit u kapën në ambientet e një pallati në lagjen nr. 4, teksa shfrytëzonin për prostitucion ose ushtronin këtë veprimtari kriminale. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.
